Юксалиш палласи
ДУАЛ ТАЪЛИМ ТАЛАБАГА НЕГА КЕРАК? ОТМГА-ЧИ?
Давлатимиз раҳбари ўтган йил 28 июнида пахта ҳосилдорлигини ошириш ва тўқимачилик маҳсулотлари экспортини кўпайтириш чора-тадбирлари юзасидан ўтказган видеоселектор йиғилишида янги ўқув йилидан бошлаб Тошкент тўқимачилик ва енгил саноат институтининг 3–4 курс талабаларини ўқитишда дуал таълим тизимини жорий қилиш бўйича топшириқ берилди. Унга кўра, ҳафтанинг уч кунида назарий дарслар, қолган уч кунида тўқимачилик технопарки ва корхоналарда амалий машғулотлар асосида ўқитиш тизимини жорий қилинадиган бўлди.
Aслида дуал таълим қандай тизим? Ўзбекистонда, айнан Тошкент тўқимачилик ва енгил саноат институтида бу тизимни қўллашдан кўзланган мақсад нима? У қандай натижа беради?
Анъанавий таълим шаклида талабалар институтда назарий билимларни кўпроқ эгаллаб, амалиёт қисмини корхона ва ташкилотларда нисбатан камроқ соатларда ўтайди. Бу усулда тайёрланган муҳандис-технологларнинг малакаси эса ҳозирги кунга келиб ишлаб чиқариш корхоналарининг талабига жавоб бермаяпти. Чунки қайси тадбиркор билан учрашмайлик, албатта, шуни таъкидламоқда.
Мамлакатимизда фаолият юритаётган аксарият тўқимачилик корхоналарида чет эллик технологлар ишламоқда. Уларга тадбиркорлар жуда юқори маош тўлайди. Шунинг учун ривожланган мамлакатларнинг таълим тизими ўрганилиб, ўқиш билан бир вақтда замонавий технология ва дастгоҳларда корхона, ташкилотларда ишлаш имконини берувчи дуал таълим шакли Ўзбекистон таълим тизимига кириб келмоқда.
Дуал таълим — талабага олий ўқув юртида таълим олиш билан бирга ўз йўналишига мос ташкилотда меҳнат қилиш, малака ошириш имкониятини берувчи тизим. Бунда талабалар ҳафтанинг уч кунида институтда назарий билимларни, қолган уч кунида корхона ва ташкилотларда ҳақиқий иш жараёнларида амалий кўникмаларни эгаллайди. Дуал таълим шаклида таҳсил олаётган талаба корхона ва ташкилотларда ишга қабул қилинганда корхона томонидан малакали устоз бириктирилади ва амалиётчига ойлик маош тўланади.
Бугунги кунда ушбу тизим Германия, Австрия, Швейцария ва Жанубий Корея каби ривожланган мамлакатларда иқтисодиётни янада ривожлантиришда жуда катта ўрин тутмоқда. Биз айнан Германия тажрибаси асосида дуал таълимни йўлга қўйишни режалаштирганмиз. Сабаби, у мазкур тизимни энг самарали йўлга қўйган давлатлардан бири. Бу мамлакат ўзининг таълим тизимига дуал таълимни 1960-йиллaрнинг ўртaлaридaн қўллай бошлаган.
Германияда бугунги кунда 1,4 миллион ёш дуал таълим шаклида ўқимоқда. Ҳар йили 500 минг ўқувчи дуал таълимда иштирок этиш учун корхоналар билан келишувга эришади. 74 фоиз ёшлар ўқишни якунлагандан сўнг иш берувчи билан меҳнат шартномаси имзолайди. Корхона томонидан ўқувчи(талаба)ларга малакали, махсус синовдан ўтган ҳамда сертификатга эга устоз бириктирилади.
Бу тизим Германияда ўрта бўғин кадрларини тайёрлашда йўлга қўйилган бўлса, Ўзбекистонда нафақат ўрта бўғин кадрларини тайёрлашда, балки олий таълим тизимида, яъни Тошкент тўқимачилик ва енгил саноат институти мисолида тажриба-синов тариқасида қўлланмоқда.
Савдо-саноат палатаси, тадбиркорлар ва Тошкент тўқимачилик ва енгил саноат институти жамоаси биргаликда ёшларга таълим беришни янги босқичга олиб чиқиш, битирувчиларни соҳасининг етук, замонавий мутахассиси этиб тайёрлаш билан бирга бизнесга қизиқишини ошириш, уларни йирик корхоналарнинг ҳамкори сифатида тайёрлашга бел боғлаган. Бунинг учун “Бир тадбиркор — уч ҳамкор” лойиҳаси ишлаб чиқилди. Унга кўра, ҳар бир мутахассислик кафедрасидаги уч нафар битирувчини ишлаб чиқариш корхонасига ҳамкор қилиб тайёрлаш устида иш олиб борилмоқда. Ҳозир институтдаги 14 та кафедрада ёш мутахассислар тайёрланаётган бўлса, ўқув йили якунида бу лойиҳа бўйича камида 42 нафар ҳамкор тадбиркор етишиб чиқади.
MQJT, [17.11.2023 16:21]
Институтда дуал таълимни ривожлантириш, бу бўйича дунё тажрибасини ўрганиш, қолаверса, тажрибамизни ўртоқлашиш мақсадида шу йилнинг 28–29 ноябрь кунлари “Дуал таълимнинг фан, таълим ва инновациялар соҳасидаги истиқболи” мавзусида халқаро анжуман ўтказилмоқда. Унга халқаро ташкилотлар, хорижий давлатлар элчихоналари ва чет эл олий таълим муассасалари ҳамда корхоналаридан 60 дан ортиқ меҳмон таклиф қилинган.
Тошкент тўқимачилик ва енгил саноат институти шу кунга қадар 200 га яқин корхона билан ҳамкорлик йўлга қўйган эди. 2022–2023 ўқув йилидан Тошкент шаҳри ва вилоятида жойлашган 60 га яқин корхона билан шартнома асосида 3-курсдаги 864 нафар талаба тажриба-синов тариқасида дуал таълим шаклида ўқитилди. Бунда ўқув режасидаги мутахассислик фанларининг ўртача 50 фоиз юкламаси, яъни амалий қисми корхоналарда ўтилди. Корхонага бориб келиши учун талабаларга транспорт ажратилди, тушлик ташкил этилди. Баъзи корхоналар ишга қабул қилинган талабаларга бажарган ишига қараб ойига 500 минг сўмдан 1 миллион сўмгача ҳақ тўлади. Олдин талабалар бўш вақтида турли соҳаларда, асосан савдо-сотиқ, хизмат кўрсатиш кабиларда иш ҳақи топган бўлса, дуал таълим тизими туфайли ўз йўналиши бўйича ҳам ўқиб, ҳам ишлаб, пул топишга эришди.
Мазкур ишларни жадаллаштириш, дуал таълимга кўпроқ тадбиркорларни жалб қилиш, уларни рағбатлантириш тизимини жорий қилиш, ишсиз аёллар ва ёшларни иш билан таъминлаш орқали камбағалликни қисқартириш мақсадида Президентимизнинг “Камбағалликни қисқартиришда тадбиркорлик субъектлари билан ўзаро манфаатли ҳамкорлик ўрнатишга қаратилган чора-тадбирлар тўғрисида”ги фармони қабул қилинди.
Фармон билан “20 минг тадбиркор — 500 минг малакали мутахассис” дастурини амалга ошириш тўғрисидаги таклифга розилик берилди. Бу дастурда тадбиркорлик субъектлари “ҳамкорлик шартномаси” асосида ихтиёрий равишда иштирок этиши, унда иштирок этган тадбиркорларга табақалаштирилган имтиёз ва переференциялар берилиши назарда тутилди. Шунингдек, Савдо-саноат палатаси, Камбағалликни қисқартириш ва бандлик вазирлиги ҳамда Олий таълим, фан ва инновациялар вазирлигининг олий таълим тизимида “Касб эгаси” дуал таълим тизимини тажриба тариқасида ишга тушириши кўзда тутилди. 2023/2024 ўқув йилидан бошлаб дуал таълим тизими Тошкент тўқимачилик ва енгил саноат институтида 3–4 курс талабалари учун жорий қилиниши белгиланди.
Меъёрий-ҳуқуқий ҳужжатнинг энг асосий жиҳатларидан бири Савдо-саноат палатаси томонидан ишлаб чиқариш корхоналарининг қўшимча ишчи кучига бўлган талаби шакллантирилади ва у талабаларга етказилади. Талабалар танланган иш ўринлари бўйича электрон йўлланма тегишли корхонага етказилади. Бунда йўлланма асосида таълим жараёнини бевосита корхоналарда ўтаган талабалар учун корхона томонидан иш ҳақи ҳисобланади ва Бандликка кўмаклашиш давлат жамғармаси маблағлари ҳисобидан ҳар ой учун мазкур иш ҳақининг 2 миллион сўмгача бўлган қисми қоплаб берилади.
Фармон ижроси бўйича 2023/2024 ўқув йилида Тошкент тўқимачилик ва енгил саноат институтининг 3-4 курсида таҳсил олаётган барча талабалар “Касб эгаси” дуал таълим тизими асосида ўқитиш тизимига тўлиқ ўтказилди. Яъни 3-курсда таҳсил олаётган 805 талаба 57 корхонага, 4-курсда ўқиётган 854 талаба 62 та корхонага тақсимланиб, белгиланган график асосида ҳафтанинг уч кунида институтда назарий дарслар, қолган уч кунида корхонада амалий дарслар асосида таҳсил олмоқда. Талабаларга корхонанинг малакали мутахассислари амалиёт раҳбари этиб тайинланган. Институт профессор-ўқитувчилари бу тизимнинг ютуқ ва камчиликларини таҳлил қилиб бормоқда.
Бу тизимнинг афзаллиги 3–4 курс талабалари корхонада ўрнатилган энг замонавий дастгоҳларда ишлашни ўрганишдан ташқари меҳнат жамоаси билан яқиндан танишиши, дуал таълим бўйича олган билимини намоён қилган, ўзини яхши томондан кўрсата олган битирувчилар корхонага ишга қабул қилинишда катта имтиёзга эга бўлиши, ишга қабул қилинганда меҳнат фаолиятига жуда енгил киришиб кетиши мумкинлигида яққол кўринмоқда.Бир неча йил олдин давлатимиз раҳбари соҳа ходимлари олдига мамлакатимизда етиштирилган хомашёни жаҳон бозорига тайёр маҳсулот сифатида олиб чиқиш, бунинг учун соҳани кластер тизимига ўтказиш, шу орқали ҳудудларда аҳолини иш билан таъминлаш вазифасини қўйган эди.
Ўзбекистон тўқимачилик ва тикув-трикотаж саноатининг 2017–2023 йиллардаги асосий кўрсаткичлари таҳлилига кўра, мамлакатда етиштирилган пахта толасини қайта ишлаш даражаси 40 фоиздан 100 фоизга етган. Ялпи ички маҳсулотда соҳанинг улуши 7,6 фоиздан 9,2 фоизга ошган. Саноат маҳсулотларидаги улуши 15 фоизга етган. Биргина тикув-трикотаж саноатининг маҳсулотлари ҳажми 88 370,0 миллиард сўмни ташкил этаётгани ҳамда соҳада 600 мингга яқин одам меҳнат қилаётганини инобатга олсак, Ўзбекистон иқтисодиётининг драйвер соҳаларидан бири бўлган тўқимачилик саноатини ривожлантириш орқали аҳолини иш билан таъминлаш, камбағалликдан чиқаришга эришиш мумкинлигини кўриш мумкин. Шундай экан, мамлакатимиз ҳудудидаги мавжуд ва янгидан ташкил этилаётган соҳа корхоналарини малакали мутахассислар билан таъминлаш учун биринчилардан бўлиб Тошкент тўқимачилик ва енгил саноат институтида дуал таълим тизимини қўллаш айни вазифаларнинг энг тўғри ечимидир.
Ҳозир юртимизда соҳа бўйича ишлаётган корхоналар сони 7 мингдан ошди. Бунга, албатта, кичик тадбиркорлик, ўрта бизнес ва йирик корхоналар киради. Асосий мақсад Германия тажрибаси асосида Тошкент тўқимачилик ва енгил саноат институтида ишбилармон тадбиркорлар, илғор ишлаб чиқарувчилар билан биргаликда замонавий етук мутахассисларни дуал таълим шаклида тайёрлашдан иборат. Бу ерда албатта Савдо-саноат палатаси координатор вазифасини бажаради.
Қилинаётган ишлар таҳлили, дастлабки хулосаларга кўра, бу тизим уч тарафлама, яъни институт, корхона ва талабага манфаатли бўлиб, соҳа корхоналарига замонавий малакали мутахассисларни тайёрлашга хизмат қилади.
Даврон ВАҲОБОВ,
Савдо-саноат палатаси раиси,
Тошкент тўқимачилик ва енгил
саноат институти ректори